Hjelp barna med å få gode sykkelvanar

Foreldre og andre føresette spelar ei viktig rolle for at barn skal utvikle sykkelferdigheiter,trafikkforståing og god åtferd i trafikken. Dei fleste barn synest det er morosamt å sykle fordi det gjev dei fridom til å bevege seg, fart og meistringskjensle. Den dagen dei meistrar sykling på to hjul for første gong, er ein dag mange barn vil hugse lenge – kanskje heile livet. Å sykle med barna er hyggeleg og nyttig for at dei skal utvikle ferdigheiter som dei vil ha god bruk for som framtidige trafikantar.

Tekniske grunnferdigheiter og aktiv bruk av sansane står sentralt. Det same gjer forståing av grunnleggjande trafikkreglar og god trafikkåtferd. Vi oppmodar difor alle foreldre om å lære barna å sykle og ta dei med på sykkelturar. Du treng ikkje å leggje lista høgt for at det skal gje godt utbyte. Her følgjer nokre råd om korleis du som forelder kan bidra til å gjere barnet ditt best mogleg rusta før sykkel-og trafikkopplæringa i regi av skulen tek til. Du får òg nokre utstyrstips og gode råd om korleis du tek vare på utstyret og tilpassar det riktig.